2010-07-27 - 11:40:00

Dy shqiptarë arratisen nga burgu italian

Dy shqiptarë arratisen nga burgu Don Bosco në Pisa të Italisë. Mediat italiane, duke iu referuar policisë

raportojnë sot se dy shqiptarët, Bledar Shehu, 27 vjec dhe Roland Dedja, 26 vjec janë arratisur nga burgu duke përdorur carcafët që i kishin lidhur me njëri-tjetrin si litar. 


Sipas policisë ata nuk ishin dënuar në mënyrë përfundimtare, por mësohet se njëri ishte arrestuar për grabitje dhe tjetri për vrasje. 




Sipas mediave italiane, pasi kaluan muret dhe nuk u dha asnjë shenjë alarmi, shqiptarët ndaluan një grua që ishte duke drejtuar një makinë tip xhip e detyruan të zbriste, morën makinën dhe u larguan me shpejtësi. 


Sekretari i sindikatës së Policisë së Burgut ka deklaruar për mediat se kjo ishte një arratisje e paralajmëruar për shkak të mungesës së stafit dhe kushteve të sigurisë në burg.




"Alarmi i sigurisë nuk funksiononte prej kohësh. Në burg ndodhen 458 të dënuar, ndërkohë që kapaciteti është vetëm 250 vende"- ka thënë Donato Capece. 


Policia nisi menjëherë kërkimet, të cilat vazhdojnë ende, por nuk ka gjurmë të të arratisurve./sh.k