2010-07-23 - 13:55:31

AKR: Duhet ngritur bashkëpunimin me Brukselin

Aleanca Kosova e Re(AKR) vlerësoi se Qeveria e Kosovës duhet të ketë planin

e detajuar të angazhimit në sferën e sundimit të ligjit, në sferën diplomatike dhe ekonomike.

Sipas kësaj partie, është momenti qenësor për vendosjen e rendit në gjithë territorin e Kosovës përfshire këtu edhe ri-vendosjen e pikave kufitare 1 dhe 31, ndërsa sa i përket bisedimeve me Serbinë, platforma e bisedimeve duhet të prezantohet në Kuvendin e Kosovës dhe prej aty të përgatitet strategjia dhe temat e rëndësishme për qytetaret e Kosovës.

AKR po ashtu thekson se duhet ngritur bashkëpunimin me Brukselin dhe lobimin për 5 njohjet nga shtetet e BE-së si dhe fillimin e përgatitjeve për prezantimin e kërkesës për anëtarësim në OKB.

“Pas shpalljes së mendimit të GJND-së për Kosovën mund të themi se fillon një epokë e re me të cilën hiqen pothuajse të gjitha barrierat formale për integrimin e Kosovës si entitet shtetëror plotësisht i barabartë në marrëdhëniet ndërkombëtare”, thekson kjo parti.

Ndërsa, sa i përket sferës ekonomike, Kosova duhet të jetë proaktive në promovimin e investimeve në Kosovë, në kohën kur Kosova është edhe njëherë lajmi kryesor në mediet ndërkombëtare. /AMC/T.L