2010-07-21 - 13:49:15

Disa media me pasaktësi deklaratat e Ban Ki-moon

Misioni i Kombeve të Bashkuara në Kosovë ka shpërndarë një sqarim

për media, ku thekson se deklarata e Sekretarit Ban lidhur me mendimin këshillëdhënës të Gjykatës Ndërkombëtare të Drejtësisë është keqinterpretuar.


Në këtë sqarim theksohet se “mbrëmë  dhe  sot,  mediat  kanë raportuar pasaktësisht rreth deklaratave të Sekretarit të Përgjithshëm Ban Ki-moon lidhur me Mendimin Këshillëdhënës të Gjykatës  Ndërkombëtare  të  Drejtësisë  për  ligjshmërinë  e  shpalljes së pavarësisë  së  Kosovës. 

Në fakt, Sekretari i Përgjithshëm në asnjë mënyrë nuk e paragjykoi Mendimin Këshillëdhënës, të cilin Gjykata do ta shpallë më
22  korrik.  Duke  u përgjigjur në pyetjen gjatë një takimi me media dje në Gjenevë,  Z.  Ban  theksoi  se  Kombet e Bashkuara do t’i diskutojnë për së afërmi  implikimet  e  Mendimit  Këshillëdhënës me Bashkimin Evropian,  dhe palët  e  tjera të përfshira dhe të interesuara për të gjetur mënyrën më të mirë  për  ta  adresuar çështjen dhe për të siguruar paqe dhe stabilitet në rajon.


Në vijim është pyetja dhe përgjigja e Sekretarit të Përgjithshëm nga takimi dje: Pyetja  (përkthyer nga frëngjishtja]) e gazetarit shqiptar. (Top Channel, Shqipëri) : Z. Sekretar i Përgjithshëm më 22 korrik Gjykata Ndërkombëtare e Drejtësisë në Hagë do ta japë mendimin e vet këshillëdhënës për pavarësinë e Kosovës.
A mendoni se Kosova do të bëhet anëtare e Kombeve të Bashkuara pas kësaj?


Sekretari  i  Përgjithshëm është përgjigjur:   Fillimisht,  jam  në dijeni se gjykimi i këtij aplikimi të Qeverisë së Serbisë për ligjshmërinë e pavarësisë së Kosovës do të  bëhet  përmes  një  mendimi  këshillëdhënës, në kërkesë të Asamblesë së Përgjithshme. Dhe unë po e pres këtë vendim më 22 korrik.

Cilido që të jetë vendimi,  unë  e  respektoj,  dhe  kuptoj se shtetet anëtare po ashtu do ta respektojnë  vendimin  e GJND-së. Kjo është një organizatë, trup gjyqësor i Kombeve  të Bashkuara. Për çfarëdo implikimi ligjor apo politik që vjen nga ky   mendim  këshillëdhënës,  shtetet  anëtare,  dhe  në  veçanti  palët  e përfshira,  do të duhet të koordinohen dhe diskutojnë rrjedhën e mëtejme të
veprimeve. 

Kombet e Bashkuara, në përputhje me rezolutën 1244 të Këshillit të  Sigurimit, dhe pasi që jemi duke e mbajtur UNMIK-un në Kosovë, po ashtu do  të  diskutojmë  për  së  afërmi  këtë  çështje  me  palët  e  përfshira drejtpërsëdrejti  dhe  me  Bashkimin  Evropian si dhe palët e tjera kyçe të përfshira  në  një mënyrë të harmonizuar në adresimin e kësaj çështjeje dhe të  sigurojnë atje paqe dhe stabilitet. Deri atëherë, ne do të vazhdojmë të punojmë  sipas 1244-shit, në mënyrë neutrale ndaj statusit. Ju faleminderit shumë./k.n