2010-03-11 - 22:21:28

Meta e Tadiç për rritje të bashkëpunimit

Presidenti serb, Boris Tadiç, ka pritur në Beograd shefin e diplomacisë shqiptare, Ilir Meta. Përkundër dallimeve rreth çështjes së Kosovës, theksi i bisedimeve është vënë

në përmirësimin e bashkëpunimit bilateral, i cili është në nivel të ulët, veçanërisht në fushën e ekonomisë, ka njoftuar kabineti i Tadicit.

Ministri i Jashtëm i Shqipërisë, Ilir Meta është pritur të enjten në Beograd nga presidenti i Serbisë Boris Tadic dhe zyrtarë të tjerë serbë.

Bisedimet janë përqendruar në marrëdhëniet ndërmjet dy vendeve, stabilitetin në rajon dhe integrimin e shteteve të Ballkanit në Bashkimin Europian, ka njoftuar Kabineti i Tadicit përmes një kumtese për media.

“Përkundër mendimeve të ndryshme rreth çështjes së Kosovës, theksi i bisedimeve është vënë në përmirësimin e bashkëpunimit bilateral, i cili është në nivel të ultë, veçanërisht në fushën e ekonomisë”, thuhet në këtë kumtesë.

Presidenti Tadic ka theksuar rëndësinë e Marrëveshjes për bashkëpunim në luftën kundër krimit të organizuar, tregtisë ilegale ndërkombëtare të drogës si dhe terrorizmit ndërkombëtar, që është nënshkruar të enjten.

Gjatë kësaj vizite dyditore Meta do të zhvilloj takime edhe me zëvendëskryeministrin për Integrim Europian, Bozidar Djelic, Ministrin e Brendshëm, Ivica Daçiç si dhe me përfaqësues të komunitetit shqiptar në Serbi.

Tirana zyrtare e ka vlerësuar si shumë të rëndësishme vizitën e Metës në kryeqytetin serb. “Vizita zyrtare e Zv. Kryeministrit dhe Ministrit të Punëve të Jashtme z. Meta në Beograd është një tregues i qartë i prioritetit që politika e jashtme e Shqipërisë i jep zhvillimit dhe forcimit të marrëdhënieve me vendet e rajonit në kuadër të përshpejtimit të perspektivës evropiane për vendet tona”, thuhet në një kumtesë të MPJ’së së Shqipërisë.

Kjo është vizita e parë e një zyrtari të lartë shqiptar prej vitit 2005, kur në Beograd qëndroi ish shefi i diplomacisë, Kastriot Islami.