2010-03-06 - 21:44:17

Shqipëria rrezikon liberalizimin e vizave

Rritja e kërkesave për azil në Belgjikë nga shtetasit serbë e maqedonas, menjëherë pas heqjes së regjimit të vizave po dëmton procesin e liberalizimit të vizave për Shqipërinë

dhe Bosnjën.

Kështu shprehet Iniciativa e Stabilitetit Evropian që vlerëson se disa vende anëtare janë frikësuar nga ky fenomen, falë dhe mënyrës së pasqyrimit nga mediat evropiane.

"Sigurisht që ekziston rreziku që kjo të vonoje procesin e liberalizimit me të tjerët. Disa vende anëtare mund të jenë panikuar, pasi në disa media evropiane pasqyrimi i ngjarjes ka krijuar në popull ndjeshmëri kundër këtij procesi, e kjo mund të sjellë vonesa. Kjo po dëmton konceptin e heqjes së vizave.

Do të kishte qenë më mirë sikur të mos kishte ndodhur ky fenomen, por nuk përjashtohej mundësia. Ka pasur vazhdimisht abuzim me viza edhe atëherë kur njerëzit duhet ta kërkonin, dhe është e qartë që do ketë abuzim me lëvizjen e lirë.

Do ketë njerëz që do kërkojnë azil, edhe nëse shanset për ta marrë janë pothuajse zero. Do ketë njerëz që do të qëndrojnë më shumë se 3 muajt e lejuar, do të qëndrojnë në mënyrë ilegale, do të kërkojnë punë, e ndoshta mund të përfshihen në aktivitete kriminale”, thotë Alexandra Stiglmayer, Drejtuese e Projektit "Lista e Bardhë Shengen”. /TCH/Telegrafi/kosovaere.ch